原文：《師說》

喺以前，踢波嗰啲人都會搵返個教練。所謂教練，就係講吓理論、教吓技術、解答你唔明嘅野。無人一出世就踢到好似美斯咁㗎嘛，點會無嘢唔明㗎？如果有嘢唔明又唔肯搵教練，咁你咪一世都只可以踢到成擗（Pat）嘢咁囉。

有啲𡃁仔比我遲出世，但係佢嘅技術比我好，我就搵佢教我。有啲阿叔大我好多，佢哋技術又勁我好多，我照樣搵佢教我。所以搵教練呢單嘢呀，洗鬼理佢大過我定細過我咩？理得佢代表隊定公園玩波嘅𡃁仔，年紀大過我定細過我，只要佢有料到，就可以做我教練。

唉，諗起都心悒(Up)！呢種係咁搵人學嘢嘅風氣無咗好耐啦！要再出多幾個美斯都好難啦！美斯勁唔勁？佢比普通球員勁唔知幾多倍，但係佢到依家都仲係聽住哥迪奧拿嘅意見，好好咁控制自己嘅飲食；反觀依家啲球員，同美斯差唔知幾多皮，但係就成日覺得自己好勁，唔肯搵人學野⋯⋯所以呢，勁人就繼續勁落去，渣嘅就繼續渣落去，嗰原因咪就係咁囉！

啲老豆好愛嗰仔，會搵最好嘅教練去教自己嗰仔，但係自己去踢波就對搵人教呢件事覺得好瘀，真係勁矛盾！嗰啲只係識講基本理論嘅吹水教練，並唔係真正意義上嘅傳授技術、解答疑問嘅教練。球員喺訓練嗰陣唔知點走位就會問教練，但係唔知點解要咁走位就唔去問教練，啲唔重要嘅嘢就去問，啲重要嘅就唔去問，我唔覺得咁樣嘅做法有幾醒囉。

喺公園玩波嗰啲細路都唔會覺得搵人教路係好瘀嘅，但係有啲人就會因為被人叫教練、或者某人自稱徒弟就去笑佢。問嗰啲笑人嘅人，佢地會講：「大家咁高咁大，佢有咩可以教我呀？」人哋地位低，你就覺得叫佢做教練好瘀；人哋地位高，你又驚俾人話你擦鞋。唉！教練呢家嘢無㗎啦。你班所謂球員睇唔起啲係公園玩波嘅細路，但係人地嘅諗法又高你幾班，真係好諷刺！

球王係冇固定嘅教練嘅，美斯曾經向Mori、Maradro、Rijkard、哥迪奧拿請教。呢一批人講踢波啲能力，佢地都比唔上美斯啊。所以話球員唔一定渣過教練，教練亦都唔一定要勁過啲球員；開竅呢家嘢係有人先有人後嘅，各種理論同技術都有人特登去專門研究，就算佢細過我定渣過我，都同樣可以係某方面做我嘅教練嘅。

我姓魏名兆偉，年十七加幾幾幾年，熱愛足球，傳、射、盤、防守、撲波樣樣識啲；不受網絡同地域限制，成日上youtube學嘢，連我自己都欣賞自己嘅熱誠，所以特登寫呢篇嘢嚟讚吓自己。