原文：《出師表》

我依家同你講：你老豆喺搞隊波搞到一半就收咗擋，而家成隊波拆咗三隊出嚟，我地呢隊最弱，就快俾人搞到連嗰練波場都無啦，真係好大鑊。好彩你老豆帶出嚟嗰班叔父夠癲，做行政嘅日日捱夜加班、比賽嗰班又搏晒命咁去護級，你估佢哋係真為咗你咩？係因為俾面你老豆，所以搏曬命咁幫你咋！

唔好話我嘈你，識嘅話就趁呢個時候好好聽吓大家意見，搞好隊波，等你老豆威吓。你自己都要醒定啲，唔好以為自己乜都唔識就成日頭耷耷，你咁樣啲叔父點敢同你講嘢呀！

行政同球員都係一家人嚟，賞罰要一致，唔好搞埋啲枱底野。做得唔好定係做得好嘅，都交返俾HR去搞，跟返隊波嘅守則去做，咁就大家都無野好講㗎啦。

就算啲叔父唔係你老豆嗰班親兄弟，但佢哋都係你嘅同事，有機會就去搵下佢哋啦，無壞嘅。其中阿之哥、禕哥、允哥係管理界都響曬朵；隊長向爺係試腳嗰陣，你老豆就忍唔住立即高薪簽咗佢，依家仲俾大家一人一票選咗做隊長添。呢班叔父當年都係你老豆重點培訓嘅，得閒就同佢哋食下飯、吹吓水，點都會有好處嘅。

做得嘢嘅就同佢地行埋啲，搞破壞嗰啲就咪鬼見佢，以前嗰大老闆就係痴埋班搞屎棍到，搞到隊波散鬼曬。一句到尾，就係記得痴住頭先講嗰幾個叔父，咁隊波好快就會升返上嚟預備爭冠㗎啦。

講返我啦，當年我都係洗吓廁所做吓打雜，求其搵餐晏仔就算數，冇諗過要搞咁多嘢。不過你老豆又唔嫌我頹，日日走幾條街去我負責嘅公廁，係咁去廁所搵我，搞到好似腎虧咁⋯⋯我好感激你老豆咁重視我，所以就答應佢做球隊嘅CEO。好景不常，輸咗場荊州盃社區盾激到你老豆係球場死咗，臨死前仲係咁叫我要睇住隊波，唉⋯⋯就咁一睇，就睇咗二十一年啦。

梗係因為你老豆知道我成日爆肝，所以臨走前都要整份大project俾我。由嗰時開始，我日日爆肝都唔敢叫攰，怕搞唔掂會辜負你老豆嘅信任。所以喺五月嗰陣我就去咗農村，去啲偏遠地區搵球場。而家新球場起好啦，球員同贊助都搵齊曬啦，就係時候帶隊返巿區，爭返隻盃，贏曬所有球隊，做返當年嘅球界一哥。呢啲就係我報答你老豆同埋向你盡忠嘅方式。至於搞function呀、會計埋數呀嗰啲野，就交返俾之哥、禕哥、允哥嗰啲行政大佬做啦。

希望你可以信吓我，俾我帶隊去巿區聯賽爭盃；爭唔到，就罰我啦，用嚟向你老豆交待。如果球迷會同啦啦隊唔夠勁，就捉之哥、禕哥、允哥佢地嚟鬧。不過你自己都唔好掛住打機，得閒就搵啲行家、搵啲叔父傾吓計，學吓人地點樣搞球隊，咁你老豆同我都死得眼閉啦。

我行李都執好曬預備去巿區，一路寫一路喊，搞到自己都唔知寫緊啲咩！